जिल्ला प्रहरी कार्यालय रुपन्देही अन्तर्गत खटिएका प्रहरी हवल्दार डुकबहादुर खड्का क्षेत्रीलाई भ्रष्टाचार मुद्दामा सजाय भएको छ । विशेषका अनुसार उनलाई एक महिना कैद र १५ हजार रुपैयाँ जरिवाना हुने भएको छ । 

क्षेत्रीले पीडित राहत कोषमा ६ सय रुपैयाँ क्षतिपूर्ति शुल्क बुझाउनुपर्ने फैसला भएको हो । विशेषका अध्यक्ष टेकनारायण कुँवर तथा सदस्यहरू तेजनारायणसिंह राई र मुरारीबाबु श्रेष्ठको इजलासले बिहीबार यस्तो फैसला गरेको हो । 

अख्तियार दुरुपयोग अनुसन्धान आयोगले क्षेत्रीलाई १५ हजार घुससहित पक्राउ गरेको थियो । उनले रुपन्देहीको भगवानपुर नाका हुँदै घरायसी सामान ल्याउन सहजीकरण गरिदिने भनी सेवाग्राहीसँग उक्त रकम लिएको पुष्टि भएको थियो । जसपछि आवश्यक अनुसन्धान गरी यसै वर्ष २६ भदौमा मुद्दा दायर भएको हो ।