खेतियोग्य जमिनमा सिचाँई सुविधा पुर्याउन पश्चिम नवलपरासीको रामग्राम नगरपालिकाले सिचाँई पुर्वाधार निर्माणको काम सुरु गरेको छ । नगरपालिकाले सिचाँई सुविधाको अभाव रहेका सुख्खा क्षेत्र छनौट गरी झन्डै दुई करोडको लागतमा ९ स्थानमा सिचाँई सुविधाका लागी डिप ट्युबेल निर्माणको काम थालेको हो । रामग्राम नगरपालिका वडा नम्बर १३ बाट काम सुरु भएको र आवश्यकता पहिचान गरी विभिन्न स्थानमा डिप ट्युबेल निर्माणलाई तिव्रता दिईने नगर प्रमुख धनपत यादवले बताउनुभयो । रामग्राम कृषि प्रधान पालिका हो, हामीले कृषिमा लगानी वृद्धि गरी यो वर्ष बाट दुत्र गतीमा किसानहरुलाई सिचाँई सुविधा पुर्याउन काम सुरु गरेका छौ, यादवले भन्नुभयो । 
सडक नाला निर्माण भन्दा पनि किसानलाई आवश्यक सिचाँईको सुविधा विस्तार गर्न सके आर्थिक अवस्था सुधार गर्न सकिने भएकाले नगरपालिकाले सिचाँईका पुर्वाधार निर्माण सुरु गरेको नगर प्रमुख यादवले बताउनुभयो ।
साथै उहाँले ट्याकिं बनेर खानेपानी विस्तार हुन नसकेको खानेपानी आयोजना पनि संञ्चालनमा ल्याउने जानकारी दिनुभयो ।
शुद्ध पिउने पानीको अभाव कम गर्न डिप ट्युबेल बाट निस्किएको पानी समेत परिक्षण गरी योग्य भएमा पिउनको लागी समेत उपयोग गर्ने योजना बनाएको नगरपालिकाले जनाएको छ । सिचाँई सुविधा नहुदा नगरका केहि स्थानमा आकाशे पानीको भर पर्नुपर्ने बाध्यतालाई मध्यनजर गर्दे नगरपालिकाले चालु आर्थिक वर्षमा सिचाँई पुर्वाधार निर्माणमा प्राथमिकता दिएको जनाएको छ । रामग्राममा अधिकांश घरधुरी कृषि पेशामा आश्रित छन् । आज रामग्राम १३ पाडाटिकरमा १६ लाखको लागतमा डिप ट्युबेल निर्माणको काम सुरु भएको छ । जय माँ ड्रिर्लिङ्ग रुपन्देहिले दशैँ अगावै काम सम्पन्न गर्ने गरी निर्माणको जिम्मा पाएको रामग्राम नगरपालिकाका ईन्जिनियर महेश्वर ठाकुरले जानकारी दिनुभयो । उक्त डिप ट्युबेल मार्फत एक सय पचास विगाह भन्दा बढि क्षेत्रफलमा सिचाँई सुविधा पुग्ने छ ।
सिचाँईको सुविधा नहुदा निकै समस्या भोग्नुपरेको बताउदै स्थानिय समाजसेवि अवधराज यादवले खुसि व्यक्त गर्नुभयो । वडा अध्यक्ष असनारायण चौधरीले वडा नम्बर १३ भित्रै अन्य स्थानमा पनि भुमिगत पानीले सिचाँईको व्यवस्था गर्न सके कृषि उत्पादनमा वृद्धि गर्न सकिने बताउनुभयो । नगरपालिकाका कृषि शाखा प्रमुख किरण कुमार गुप्ताले रामग्राममा कृषि उत्पादन वृद्धि गर्न सिचाँईका कार्यक्रम विस्तार गरी कृषिलाई आधुनिकिकरण तर्फ लानुपर्नेमा जोड दिनुभयो ।