कपिलवस्तुको विजयनगर गाउँपालिका वडा नम्बर–३ रामनगर डिहवा गाउँका स्थानीय उर्लंदो सुराही नदीको कटानले नदी गाउँमा पस्ने डरले राम रामको भरमा बस्न बाध्य छन् । गाउँको १० हजार बिगाहा नदी कटानका कारण बगरमा परिणत भएको छ ।
जसमा स्थानीयले आठ नम्बरी २ हजार बिगाहा जति जग्गा जोत भोग गरेका खेतीयोग्य जमिनसमेत कटान भएको छ । सुरही नदीको तीव्र कटानका कारण रामनगर गाउँ साघुरिदै गएको छ। प्रत्येक वर्ष नदीले ४ सय मिटरको क्षेत्रमा कटान गर्दै गाउँतिर पस्दै आई रहेको छ ।
नदीको बाढीले गाउँमा जाने बाटोसमेत बगाएपछि रामनगर डिहवाबासी त्रसित भएका छन् । नदी कटानले १५ घर नदी कटानको उच्च जोखिममा रहेका छन् । बाढी गाउँमा समेत पस्ने गरेपछि असुरक्षित भएका स्थानीय तत्कालै नदी किनारमा तटबन्ध निर्माण गर्नुपर्ने बताउछ्न ।
नदीको मूलधारको पानीले गाउँतर्फ कटान गर्दै बग्न थालेपछि वर्षातको समयमा आवतजावतमा समस्या सिर्जना भएको बताए । गाउँ नै जोखिममा परेपछि जीउधनको सुरक्षाका निम्ति सम्बन्धित निकाय र सरोकारवालालाई यस विषयमा ध्यान पु¥याउन स्थानीय बब्बु भरले आग्रह गरे ।
उनी भन्छन् “ गाउँमा नदी पस्के परे गाउँ डुबान होइके एके नेता लोगन जल्दी समाधान गर्दिई ते अच्छा रहत, हाम्रे राम राम कहेक कौनो विकल्प नही। “ नदी कटानको जोखिममा परेका गाउँ बासीहरू अति गरिब भएकोले अन्यत्र गएर घर बनाउन सक्ने अवस्था समेत नरहेको र अहिले नदीले बाटो काटेपछि झन् गाउँ बासी समस्यामा परेको वडा अध्यक्ष हृदय विकास चौधरीले बताए । उनले समयमै उनीहरूको सुरक्षाका लागि तत्कालै तटबन्धको आवश्यकता देखिएको बताए ।
यता विजयनगर गाउँपालिकाका अध्यक्ष गोपाल बहादुर थापाले गाउँको सिरानमा रहेको नदी कटान नियन्त्रणका लागि स्थानीय तहको प्रयासले मात्र नहुने भएकाले प्रदेश वा सङ्घबाटै ठुलो योजना आवश्यक पर्ने देखिएको बताए । उनले पालिकाको सीमित स्रोतले तटबन्ध निर्माणका लागि बजेट नपुग्ने भएकोले प्रदेश र केन्द्र सरकारसँग पटक पटक पहल गर्दै आएको उनको भनाई छ ।