पश्चिम नवलपरासीमा हुलाकि सडक निर्माणमा ढिलासुस्ती भएपछि प्रतापपुर गाँउपालिकाका अध्यक्ष उमेशचन्द्र यादव अनसनमा बस्नुभएको छ । आज देखि रिले अनसन सुरु गर्नुभएका अध्यक्ष यादवलाई जिल्लाका राजनैतिक दल र स्थानिय तहका जनप्रतिनिधिले साथ दिएका छन् । हुलाकि सडक अन्र्तगतको नारायणचोक त्रिवेणी खण्डमा पर्ने गोपिगंज देखि बेलाटारी सम्मको साढे छ किलोमिटर लामो सडक जिर्ण हुदा समेत निर्माण नभएको भन्दै अध्यक्ष यादव अनसनमा बस्नुभएको हो । उक्त सडक निर्माणको जिम्मा पाएको बज्र महालक्ष्मी जेभिले ठेक्का लागेको ६ वर्ष हुदा समेत जम्मा ३५ प्रतिशत मात्र काम सम्पन्न गरेको छ । संघिय सरकार अन्र्तगतको हुलाकि राजमार्ग योजना कार्यालय कपिलवस्तु मार्फत ठेक्का सम्झौता भएको उक्त आयोजना सम्पन्न गर्न पटक पटक ध्यानआर्कषण गराएपनि सुनुवाई नभएपछि बाध्य भएर अनसनमा बस्नुपरेको अध्यक्ष यादवले बताउनुभयो ।

आज देखि २७ गते सम्म इलाका प्रशासन कार्यालय सेमरी अगाडि रिले अनशनमा बस्ने र कामले गति नलिए २८ गते बाट आमरण अनसनमा बस्ने अध्यक्ष यादवले बताउनुभयो । यस विषयमा यस अघिनै प्रधानमन्त्रीको समेत ध्यानआर्कषण गराएको गाँउपालिकाले जनाएको छ । यसअघि संघीय हुलाकी सडकको अधुरो काम तत्काल सम्पन्न गर्न संघ सरकारलाई पत्राचार र जिल्ला प्रशासन कार्यालयमा धर्ना दिएपनि आफ्ना माग पूरा नभएको भन्दै आजबाट रिले अनशन सुरु गरेको बताईएको छ ।

अध्यक्षको नेतृत्वमा गाउँपालिकाका वडा अध्यक्ष र जनप्रतिनिधिहरू संयुक्तरुपमा अनशनमा बसेका हुन् । संविधानसभा सदस्य विक्रम खनाल, प्रदेश सभा सदस्य विश्वप्रेम पाठक लगायत जिल्लाका दलका नेता पनि अनशनमा सहभागी भएका छन् । २०७९ सालमा निमार्ण सम्पन्न हुनुपर्ने सडक अझै सम्पन्न भएको छैन । जिल्लामा तिन खण्डमा विभाजन गरेर भईरहेको हुलाकि सडकको सबै खण्डको काम उस्तै सुस्त छ ।