अविरल वर्षाका कारण गत जेठ २८ गतेदेखि देशका विभिन्न स्थानमा आएको बाढी, पहिरोलगायत मनसुनजन्य विपदबाट आज दिउँसोसम्म १८२ जनाको मृत्यु भएको छ।
बाढी, पहिरोलगायत विपदबाट काठमाडौँ उपत्यकामा ३ जना, कोशी प्रदेशमा २७ जना, मधेश प्रदेशमा ८ जना, बागमती प्रदेशमा ३२ जना, गण्डकी प्रदेशमा ५५ जना, लुम्बिनी प्रदेशमा ३६ जना, कर्णाली प्रदेशमा १० जना र सुदूरपश्चिम प्रदेशमा ११ जना गरी १८२ जनाको मृत्यु भएको केन्द्रीय प्रहरी प्रवक्ता एवं प्रहरी नायव महानिरीक्षक दानबहादुर कार्कीले जानकारी दिए।
उनका अनुसार बाढीपहिरोका कारण काठमाडौँ उपत्यकामा ११ जना, कोशी प्रदेशमा ३८ जना, मधेश प्रदेशमा १२ जना, बागमती प्रदेशमा २३ जना, गण्डकी प्रदेशमा ४६ जना, लुम्बिनी प्रदेशमा १८ जना, कर्णाली प्रदेशमा ५७ जना र सुदूरपश्चिम प्रदेशमा २८ जना गरी २३३ जना घाइते भएका छन्।
यसैगरी काठमाडौँ उपत्यकामा २८ जना, कोशी प्रदेशमा ४९ जना, बागमती प्रदेशमा १२ जना, गण्डकी प्रदेशमा १४ जना, लुम्बिनी प्रदेशमा ३ जना, कर्णाली प्रदेशमा २ जना र सुदूरपश्चिम प्रदेशमा ५ जना गरी ११३ जनाको उद्धार गरिएको पनि प्रवक्ता कार्कीले जानकारी दिए।
उनले भने, “बाढीपहिरोमा कोशी प्रदेशमा ३ जना, मधेश प्रदेशमा एकजना, बागमती प्रदेशमा ४१ जना, गण्डकी प्रदेशमा २ जना, लुम्बिनी प्रदेशमा एकजना, कर्णाली प्रदेशमा एकजना र सुदूरपश्चिम प्रदेशमा एकजना गरी ५० जना बेपत्ता भएका छन्। बेपत्ताको खोजी जारी छ।”
बाढीबाट आजसम्म ३८४ घर डुबानमा परेका, ३२१ घर, १११ गोठ, ५१ पुल, ४ विद्यालय र दुई सरकारी कार्यालयमा क्षति पुगेको प्रहरीले जनाएको छ।
बाढीपहिरोबाट सोही अवधिमा ८३८ पशुचौपाया मरेका छन्। ४ हजार ७८७ परिवार विस्थापित भएका प्रहरी प्रवक्ता कार्कीले बताए।